TUKEURAN IEU SAJAK

Tukeuran ieu sajak

Ku salambar simbut atawa samak saheulay

Heug rungkupkeun ka barudak anu teu kaburu heuay

Pating golepak dina trotoar

Tukeuran ieu sajak

Ku beas wuluh atawa heucak

Heug sidkahkeun ka nu haropak

Anu marangkuk di saung atawa di kolong sasak

Tukeuran ieu sajak

Ku sababaraha siki pelor

Heug tembakkeun kana genggerong koruptor manipulator

Sina enya kalojor

Tukeuran ieu sajak

Ku beubeutian tina kalbu anu rido

Keur nyembor anu balangsak

(lamun teu kitu sasaak)

(Karya Yus Rusyana)